શહીદ ભગતસિંહ આતંકવાદી ???

Bhagatsinh at Central Jail

મિત્રો, આપણી rijadeja.com વેબસાઇટ અને તેના બ્લોગ પર આપણે લગભગ શૈક્ષણિક બાબતોનો જ ઉલ્લેખ કરીએ છીએ પણ આજે 23 માર્ચ એટલે કે શહીદ દિવસ છે ત્યારે હું મારી જાતને આ વિશે લખતા કંઇ રીતે રોકી શકુ ?

આજના દિવસે એટલે કે 23 માર્ચ, 1931નાં રોજ ભારતના ફિલ્મી નહી પણ સાચા હિરો સમાન ભગતસિંહ, સુખદેવ અને રાજગુરૂને બ્રિટિશ સરકાર દ્વારા ફાંસી આપવામાં આવી હતી.
આ શહીદોને ફાંસી આપવાની તારીખ 24 માર્ચ, 1931 નિર્ધારિત કરવામાં આવી હતી –પણ ભારતના એક મહાન નેતા, જેને દેશ બહુ જ વધુ પડતુ માન આપે છે તેવા નેતાએ બ્રિટિશ ઑથોરીટીને રાતોરાત મળીને ભલામણ કરી કે જો 24 તારીખે ફાંસી આપવામાં આવશે તો પ્રજા હોબાળો મચાવશે તેથી જો ફાંસી આપવી જ હોય તો નક્કી કરેલ તારીખ પહેલા જ આપી દો !!!! એવુ કહી શકાય કે જો આ ‘મહાન’ વ્યક્તિએ આ પ્રકારનો હસ્તક્ષેપ ના કર્યો હોત તો પ્રજા અને તેમના કાર્યકરો ફાંસીનો વિરોધ કરી અને અટકાવી શક્યા હોત. પણ કદાચ તે નેતાને ભગતસિંહની હયાતીમાં પોતાનું ભવિષ્ય અંધકારમય દેખાતું હતું તેથી જ આ પ્રકારનું કૃત્ય કર્યું હશે.

ભગતસિંહનો દેશ સેવા માટેનો ઇતિહાસ બહુ લાંબો નથી કારણ કે 23 વર્ષની ઉમરે તો તેઓ શહીદ થઇ ગયા હતા પણ આ નાની ઉમરમાં તેઓ દેશ માટે જે બલિદાન આપી ગયા તેને આ ભારતવર્ષ ક્યારેય ભુલી નહી શકે. કેન્દ્ર સરકારની સી.બી.એસ.ઇ.ના પાઠ્યપુસ્તકોમાં તેઓને ‘આતંકવાદી’ પણ ગણાવવામાં આવ્યા હતા પણ તેઓ બ્રિટિશરો માટે આતંકવાદી હતા અને ભારત દેશની આઝાદી માટે તેઓએ બ્રિટિશ સરકાર વિરુદ્ધ આતંક મચાવ્યો હતો જે કોઇ ગુનાહિત કૃત્ય નહતુ પણ દેશા સેવા હતી. આપણા મહાન ગ્રંથ ગીતાજીમાં પણ ભગવાન શ્રી કૃષ્ણ એ કહ્યું છે કે ‘હણે તેને હણવામાં કોઇ પાપ નથી’. બ્રિટિશરો એ ભારતીય પ્રજા પર અસહ્ય અત્યાચારો કર્યા હતાં તે સંજોગોમાં તેની વિરુદ્ધ આતંકવાદ કરવો તે કોઇ પાપ નહી પણ એક ફરજ બની જાય છે.

ભારતવર્ષમાં કદાચ ભગતસિંહ જેવો કોઇ ક્રાંતિકારી નહી જન્મે કારણ કે જેમ જેમ સમય વિતતો જાય તેમ તેમ લોકોની માનસિકતા બદલાતી જાય છે, દેશપ્રેમ ઘટતો જાય છે, દેશનું ભલુ ઇચ્છવાને બદલે વ્યક્તિગત ભલુ ઇચ્છનારા લોકોનો વધારો થતો થાય છે. ભારત જેવા વિશાળ અને લાંબો સાંસ્કૃતિક ઇતિહાસ ધરાવતા દેશમાં આખરે લોકોના મનમાં એક જ વિચાર આવી જાય છે –આપણે શું?

--R. I. Jadeja