સફળતા / પ્રસિદ્ધી માટે આંધળી દોડ ?

આજના આ ઝડપી યુગમાં આપણે જોઇએ છીએ કે લોકો સ્પર્ધામાં ટકી રહેવા માટે તનતોડ મહેનત કરતા હોય છે. સ્પર્ધાત્મક વાતાવરણમા માનવીની એવી હાલત છે કે દરેક જગ્યાએ તેને પોતાની દૃષ્ટિ રાખવી પડે છે અન્યથા સ્પર્ધામાથી બહાર ફેંકાઇ જવાની તૈયારી પણ રાખવી જ પડે છે.

સ્પર્ધામાં ટકી રહેવા માટે દરેક મહેનત કરવી જોઇએ તે વાત એક લેવલ પર માની શકાય પરંતુ જ્યારે પણ કોઇ વાતનો અતિરેક થાય ત્યારે તે નુકશાન કારક નિવડે તે પણ એક સનાતન સત્ય છે. એવુ જ કંઇક રોજગારલક્ષી વેબસાઇટ્સ, બ્લોગ્સ અને ન્યૂઝની બાબતમા જોવા મળે છે.
હાલ ઇન્ટરનેટ પર રોજગારની માહિતી આપતા અસંખ્ય બ્લોગ્સ / સાઇટ્સ જોવા મળે છે. આમ જોઇએ તો આ સારી બાબત છે કે દરેક વ્યક્તિઓને કોમ્પ્યુટર અથવા મોબાઇલ ફોનના આધુનિક માધ્યમ વડે અપડેટ કરી શકાય છે પરંતુ હાલમા જ એક રોજગારલક્ષી સમાચાર પત્રમાં CRPFમાં હજારોની સંખ્યામા ભરતી હોવાના ન્યૂઝ વાંચ્યા ત્યારે એક ઝાટકો લાગ્યો. ઝાટકો લાગવાનું કારણ એ હતું કે આ ન્યૂઝ જો સાચા હોય તો rijadeja.com વેબસાઇટ પર કેમ નથી ? કારણ કે આપણી આ વેબસાઇટ પર આપણે દરેક અગત્યની સરકારી ભરતીઓની લેટેસ્ટ માહિતી મુકીએ છીએ ત્યારે આવી હજારોની સંખ્યામાં ભરતી થતી હોય તો તેની માહિતી મુકવામાં ચૂક કંઇ રીતે થઇ ? આ ભરતીની જાહેરાત rijadeja.com વેબસાઇટ પર કેમ નથી તેવો ખુલાસો માંગતા અસંખ્ય ઇમેઇલ પ્રાપ્ત થયા અને થોડી ઊંડી તપાસ કરતા માલૂમ પડ્યુ કે તે રોજગારલક્ષી સમાચાર પત્રમાં જે જાહેરાત છે તે ઑગષ્ટ, 2010માં આવેલી ભરતીની માહિતી હતી. અને ભળતો મહિનો જોઇ અમુક સમાચાર પત્રોના તંત્રીઓ તેમજ વેબસાઇટ્સ / બ્લોગ્સના એડમીનીસ્ટ્રેટરો દ્વારા તેને 2013ની ભરતી માની અને તેને પ્રકાશિત કરી દેવામાં આવી !!!!!

“માણસ માત્ર, ભૂલને પાત્ર” તેવી લોકવાયકાને આધારે એવુ માની શકાય કે આ પ્રકારની ભુલ થવી તે સામાન્ય છે પરંતુ આવી ભરતીની જાહેરાત જોઇ અસંખ્ય વિદ્યાર્થીઓએ CRPFની વેબસાઇટ પર આ ભરતીની માહિતી શોધવા માટે કલાકોની કલાકો વેડફી. ઓનલાઇન ફોર્મ ભરવાની માહિતી હતી તેને લીધે વિદ્યાર્થીઓને એ બાબતનો ખ્યાલ આવ્યો કે આવી કોઇ ભરતી છે જ નહી. જો ફોર્મ મેન્યુઅલી ભરવાનું હોત તો હજારો વિદ્યાર્થીઓ આવી ભુલના લીધે ફોર્મ અને ફી જે-તે ભરતી બોર્ડને મોકલી દે તે વાતમાં કોઇ શંકાને સ્થાન નથી.

સ્પર્ધામાં ટકી રહેવા માટે દોટ મુકવી તે એક સારી બાબત છે પરંતુ આંધળી દોટ મુકવી તે ક્યારેક પોતાને અથવા બીજાને મુશ્કેલીમાં મુકી દે છે તે વાતમાં પણ કોઇ શંકા નથી જ.

-- R. I. Jadeja

આપનો પ્રતિભાવ આપવા અહિ ક્લિક કરો