મતદાન = કર્મ, યોગ્ય વ્યક્તિને મતદાન = ધર્મ

લોકસભાની સામાન્ય ચુંટણીના પડઘા પડી રહ્યાં છે, પ્રચાર-પ્રસાર (યોગ્ય શબ્દોમાં કહીએ તો એકબીજાની ઝાટકણી / ખોદણી) જોરશોરથી થઇ રહી છે. પ્રજાને છેલ્લા પાંચ વર્ષમાં સત્તા પક્ષ અને વિપક્ષે કેવા કેવા કૌભાંડો કર્યા તેનું ઓટોમેટીક રિકોલીંગ ન્યૂઝ ચેનલ, ઇન્ટરવ્યુ અને પત્રિકાઓના માધ્યમથી થઇ રહ્યું છે.

જ્યારે ‘વેસ્ટ માંથી જ બેસ્ટ’ ઉમેદવારો શોધવાના હોય ત્યારે ‘બિચારી પ્રજા’ શું કરે? પણ ભારત જેવા લોકશાહી શાસન ધરાવતા આ દેશમાં જ્યારે ચુંટણી આવે ત્યારે પ્રજાનો ઉત્સાહ જોઇએ તેવો હોતો નથી. મતદાનના દિવસે ફરજિયાત રજા હોવાથી અમુક લોકો આ રજાને ‘એન્જોય’ કરવા ઇચ્છે છે, પત્નિ અને બાળકો સાથે સમય પસાર કરવા ઇચ્છે છે, તે એક દુઃખદ બાબત છે. કાયદાકીય રીતે ભારતના દરેક નાગરિકોને પોતાનો વાણી સ્વાતંત્ર્યનો અધિકાર છે જ પણ નૈતિકતાની દૃષ્ટિએ જોઇએ તો, મતદાન અધિકાર ધરાવનાર અને મતદાન ન કરનાર કોઇપણ ભારતીયને કોઇપણ પક્ષ અથવા સરકાર માટે ખરાબ બોલવાનો કોઇ જ અધિકાર નથી.

લોકશાહી શાસન પદ્ધતિમાં મતદાન કરવું એ નાગરિકોનો ધર્મ છે પણ વાસ્તવિક રીતે જોવા જઇએ તો આ ધર્મનું આંધળુ અનુકરણ કરવું અથવા તો અયોગ્ય વ્યક્તિ / ઉમેદવારને મત આપવું એ ‘પાપ’ છે.

આપણે અહી કોઇ રાજકીય વ્યક્તિ અથવા પાર્ટીનો પ્રચાર નથી કરવો પણ સ્પર્ધાત્મક પરીક્ષાઓની તૈયારી કરતા મારા વિદ્યાર્થી ભાઇ બહેનોને એક નમ્ર વિનંતી કરીશ કે તેઓ આ દેશનું ભવિષ્ય છે અને જો તેઓ યોગ્ય મતદાન કરશે તો જ તેઓ આ દેશના ભવિષ્યને ઉજ્જવળ બનાવી શકશે અને તો જ યુવા ધનનો યોગ્ય ઉપયોગ થયો ગણાશે. ‘યોગ્ય મતદાન’ શબ્દ કદાચ પુરતો છે કારણકે આજનો દરેક ભારતીય એ જ્ઞાન ધરાવે છે કે કોણ યોગ્ય છે અને કોણ અયોગ્ય! મતદાન અધિકાર ધરાવતા દરેક વિદ્યાર્થીઓ મતદાન કરી પોતાનું કર્મ અને ધર્મ બન્નેનું પાલન કરે તેવી આશા રાખવામાં આવે છે. અહી ફરી એકવાર યાદ અપાવવું જરૂરી છે કે ‘મતદાન કરવું એ કર્મ છે અને યોગ્ય મતદાન કરવું એ ધર્મ છે’.

આપના ઉજ્જવળ ભવિષ્ય માટે કોચીંગ સેન્ટરની મદદ વિના, સ્વ-અધ્યયન કરી સફળતા મેળવો તે માટે શુભકામનાઓ...

આપનો અભિપ્રાય નીચે આપેલ બોક્સમાં જરૂરથી આપશો

--R. I. Jadeja